Mae Clwb Busnes Tîm Cymru yn gyfle unigryw i ddathlu talent a balchder yr athletwyr yng Ngemau’r Gymanwlad.

Prif ddiben lansio’r Clwb Busnes yw amlygu dyfnder ac ehangder doniau chwaraeon ledled Cymru, gan bwysleisio pŵer brand Tîm Cymru a phwysigrwydd gyrru’r rhwydwaith busnes ar draws y rhanddeiliaid presennol a phartneriaid y dyfodol, gan roi busnesau Cymru ar y llwyfan cenedlaethol a rhyngwladol ar yr un pryd.

Dywedodd Prif Swyddog Gweithredol Tîm Cymru, Rebecca Edwards-Symmons: ‘Mae cael y cyfle i lansio’r Clwb Busnes o fewn fy mlwyddyn gyntaf wedi bod yn wych. Mae canolbwyntio ar wahanol bynciau ym mhob un yn rhoi’r cyfle i ni gynnwys siaradwyr gwadd a phanelwyr unigryw. Mae hefyd yn rhoi’r cyfle allweddol inni ddod â busnesau ledled Cymru ynghyd i ddysgu am y Gemau, Tîm Cymru a chyfle pellach i rwydweithio a chreu perthnasoedd a phartneriaethau newydd. Roedd 2023 yn lansiad gwych i ni, ac edrychwn ymlaen at ddigwyddiadau eraill y Clwb Busnes yn 2024’.