Bowls Lawnt

Mae Bowls Lawnt yn un o chwaraeon craidd rhaglen Gemau’r Gymanwlad. Mae hyn yn golygu ei fod wedi cael ei chwarae ym mhob un o’r Gemau ers 1930, ac eithrio Kingston ym 1966. Erys y gamp yn un o ddisgyblaethau mwyaf llwyddiannus Cymru ers ei chyflwyno ym 1930, gan ennill cyfanswm o 28 o fedalau gan gynnwys Para Fowls Lawnt. Daeth y foment i gipio’r fedal aur gyntaf yn 1986 pan fowliodd pedwarawd y dynion a’r menywod i fuddugoliaeth. Yn 2018 gwelwyd Cymru yn cipio un o bob un o’r safleoedd podiwm, gydag Aur yn y parau dynion (Daniel Salmon a Marc Wyatt), arian yn senglau’r menywod (Laura Daniels) ac efydd mewn parau para-chwaraeon cymysg (Julie Thomas a Gilbert Miles).