Bydd y cydweithrediad yn golygu bod WISC yn gweithio ochr yn ochr â Gemau’r Gymanwlad Cymru i hyrwyddo chwaraeon, addysg a datblygiad ieuenctid, tra’n annog mwy o ymgysylltiad a chyfleoedd i bobl ifanc ledled Cymru.

Dywedodd Rebecca Edwards-Symmons, Prif Swyddog Gweithredol Gemau’r Gymanwlad Cymru:

“Hoffem roi croeso cynnes iawn i WISC ymuno â’r sefydliad fel ychwanegiad gwych arall at deulu’r bartneriaeth. Mae’r gwerthoedd a rennir rhwng Gemau’r Gymanwlad Cymru a WISC – yn enwedig o ran datblygu ieuenctid, addysg ac uchelgais – yn gwneud hon yn bartneriaeth naturiol a chyffrous.”

Bydd y bartneriaeth yn cynnig cyfle i ddisgyblion o bob cwr o Gymru gysylltu’n agosach â mudiad Gemau’r Gymanwlad, tra’n hyrwyddo gwerthoedd gwaith tîm, gwydnwch a balchder Cymreig.

Ychwanegodd Emma Verrier, Prif Swyddog Gweithredol Cyngor Ysgolion Annibynnol Cymru:

“Fel yr unig sefydliad sy’n cynrychioli’r sector ysgolion annibynnol yng Nghymru yn unig, mae Cyngor Ysgolion Annibynnol Cymru yn hynod falch o fod yn cefnogi Tîm Cymru dros y pedair blynedd nesaf. Cawsom ein denu’n arbennig at y bartneriaeth hon oherwydd ei ymdeimlad cryf o hunaniaeth Gymreig a’i hymrwymiad i gynhwysiant – gwerthoedd sy’n berthnasol i’r cymunedau ysgol amrywiol.

Mae’n hanfodol bod ein dysgwyr yn cael y cyfle i ymgysylltu â’r athletwyr a chael eu hysbrydoli ganddyn nhw – nid yn unig fel esiamplau da mewn chwaraeon, ond fel cynrychiolwyr penderfyniad, cymuned a balchder yn ein cenedl. Rydym yn gyffrous am y cyfleoedd y mae’r bartneriaeth hon yn eu cynnig i’n hysgolion gysylltu’n ddyfnach ag ysbryd chwaraeon a diwylliant Cymru.”

Mae’r cydweithrediad newydd hwn yn nodi carreg filltir arall wrth baratoi ar gyfer Glasgow 2026 ac mae’n tynnu sylw at bwysigrwydd partneriaethau traws-sector o ran cefnogi athletwyr a chymunedau Cymru wrth i ni agosáu at 12 mis cyn cychwyn y 23ain Gemau’r Gymanwlad.