Mae’r bartneriaeth yn sail i ymrwymiad y Gymdeithas i gefnogi a grymuso cenedlaethau’r dyfodol, trwy ysbrydoli pobl ifanc yng Nghymru i fagu’r hyder, gwybodaeth a sgiliau bywyd i’w helpu i fyw, dysgu ac ennill

Yn unol â’i huchelgais symudedd cymdeithasol i helpu i ddod o hyd i, ariannu ac ehangu mynediad at gyfleoedd gwaith i bobl ifanc heb gynrychiolaeth ddigonol, bydd y Gymdeithas yn cefnogi cyflwyno Rhaglen Ymgysylltu Ieuenctid Tîm Cymru yn weithredol.

Mae’r rhaglen ddwyieithog hon wedi’i chynllunio i gryfhau cysylltiadau â grŵp amrywiol o fyfyrwyr mewn 200 o ysgolion cynradd, uwchradd ac arbenigol a grwpiau chwaraeon ac ieuenctid ledled Cymru dros y tair blynedd nesaf.

Bydd athletwyr Tîm Cymru o dros 20 o gampau posib Gemau’r Gymanwlad yn cyflwyno gweithdai ystafell ddosbarth wedi’u teilwra, gwasanaethau, sesiynau holi ac ateb a chyflwyniadau. Bydd y sesiynau hyn yn cyfuno gwerth a phwysigrwydd ymgysylltu â chwaraeon gyda themâu megis amrywiaeth a chynhwysiant, iechyd a lles corfforol a meddyliol, addysg ariannol, sgiliau menter a chynaliadwyedd.

Dywedodd Tony Smith, Prif Swyddog Effaith a Llywodraethu Cymdeithas Adeiladu’r Principality, “Mae’r cydweithrediad hwn yn gam cadarnhaol ymlaen i ni gyrraedd ac ymgysylltu â mwy o bobl ifanc heb gynrychiolaeth ddigonol ledled Cymru. Rydyn ni eisiau helpu cenedlaethau’r dyfodol i gael y dechrau gorau mewn bywyd, i wireddu eu gobeithion a’u dyheadau, a’u hysbrydoli ar y cyd am lwybrau’r dyfodol, nid yn unig mewn chwaraeon, ond hefyd mewn addysg bellach a’r byd gwaith ehangach.”

Gan rannu ei brwdfrydedd, dywedodd Rebecca Edwards-Symmons, Prif Swyddog Gweithredol Tîm Cymru: “Mae Tîm Cymru a Chymdeithas Adeiladu’r Principality ill ddau yn ffynnu ar ein diwylliant Cymreig ac angerdd dros gefnogi cenedlaethau’r dyfodol, sy’n ein gwneud ni’n dîm perffaith. Rydw i wrth fy modd mai nhw yw ein partner Cymdeithas Adeiladu swyddogol, ac rydyn ni’n edrych ymlaen at weithio gyda’r tîm ar sawl prosiect cyffrous dros y tair blynedd nesaf.’